ଓଡିଶା ଆଦର୍ଶ ବିଦ୍ୟାଳୟ ସମସ୍ୟା ସୁଧୁରିବ କେବେ ?
ହାଟଡ଼ିହି,(ଯୁଗାବ୍ଦ ନ୍ୟୁଜ୍) : ହାଟଡିହି ବ୍ଲକର ସୁନ୍ଦରାପାଳ ଠାରେ ଖୋଲାଯାଇଥିବା ଓଡିଶା ଆଦର୍ଶ ବିଦ୍ୟାଳୟଟି ନାନା ସମସ୍ୟା ଦେଇ ଗତି କରୁଥିବାବେଳେ ସମସ୍ୟା ଗୁଡିକ ସୁଧାରିବା ଦିଗରେ ସରକାରଙ୍କ ଉଦାସୀନତା ମନୋଭାବ ଗୋଟିଏ ବି ସମସ୍ୟା ସମାଧାନ ହୋଇପାରୁ ନାହିଁ ଓ ଶିକ୍ଷକ ଅଭାବରୁ ଶିକ୍ଷା ବ୍ୟବସ୍ଥା ବିପର୍ୟ୍ୟସ୍ଥ ହୋଇ ପଡିଥିବାରୁ ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି । ଏହି ଆଦର୍ଶ ବିଦ୍ୟାଳୟରେ ସି.ବି.ଏସ.ଇ ପ୍ୟାଟେନରେ ଉଚ୍ଚ ମାନର ଶିକ୍ଷାଦାନ ପାଇଁ ସରକାର ଯୋଜନା କରିଥିବାବେଳେ ଶିକ୍ଷା ବିଭାଗର ଆନ୍ତରିକତା ଅଭାବରୁ ଶିକ୍ଷାଦାନ ସଠିକ ଭାବେ କାର୍ୟ୍ୟକାରୀ ହୋଇପାରୁ ନାହିଁଁ । ବିଦ୍ୟାଳୟ ଖୋଲାଯିବାର ଦେଢ଼ବର୍ଷ ବିତି ଯାଇଥିଲେ ମଧ୍ୟ ଆଜି ପର୍ୟ୍ୟନ୍ତ ବିଦ୍ୟାଳୟରେ ଆବଶ୍ୟକ ଶିକ୍ଷକ ନିଯୁକ୍ତି କରାଯାଇ ପାରିଲାନାହିଁ । ଫଳରେ ଛାତ୍ରଛାତ୍ରୀ ଓ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଖବରରୁ ଜଣାଯାଇଛି ଯେ ଏହି ବିଦ୍ୟାଳୟରେ ଗତ ଜୁନ ୨୦୧୮ ରୁ ଶିକ୍ଷାଦାନ ଆରମ୍ଭ ହୋଇଛି । ଏହି ବିଦ୍ୟାଳୟରେ ୨୨୧ଜଣ ଛାତ୍ରଛାତ୍ରୀ ତିନୋଟି ଶ୍ରେଣୀରେ ଅଧ୍ୟୟନ କରୁଛନ୍ତି । ପ୍ରଥମରୁ ନୁଆକରି ବିଦ୍ୟାଳୟ ଖୋଲିଥିବାରୁ କିଛି ଶିକ୍ଷକଙ୍କୁ ପାଖ ସ୍କୁଲ ମାନଙ୍କରୁ ଡେପୁଟେସନରେ ଅଣାଯାଇ ଶିକ୍ଷାଦାନ କରାଯାଇଥିଲା । ପରେ ଶିକ୍ଷା ବିଭାଗ ପକ୍ଷରୁ ୭ଜଣ ଶିକ୍ଷକ ନିଯୁକ୍ତ କରାଯିବାରୁ ଡେପୁଟେସନରେ ଆସିଥିବା ଶିକ୍ଷକ ମାନଙ୍କୁ ତାଙ୍କ ସ୍କୁଲକୁ ଫେରାଇ ଦିଆଯାଇଥିଲା । ସ୍କୁଲଟି ସି.ବି.ଏସ.ଇ ପେଟେନରେ ଚାଲୁଥିବାରୁ ଏଠାରେ ଇଂରାଜି ଶିକ୍ଷକଙ୍କ ଆବଶ୍ୟକତା ଅଧିକ ଥିବାବେଳେ ଆଜି ପର୍ୟ୍ୟନ୍ତ ଇଂରାଜି ଶିକ୍ଷକ ନିଯୁକ୍ତି ଦିଆଯାଇ ନାହିଁଁ । ସେହିପରି ଓଡିଆ ଶିକ୍ଷକଙ୍କୁ ମଧ୍ୟ ନିଯୁକ୍ତି ଦିଆଯାଇ ନଥିବାରୁ ସଂସ୍କୃତ ବିଷୟରେ ଶିକ୍ଷାଦାନ ହୋଇ ପାରୁ ନାହିଁଁ । କମ୍ପ୍ୟୁଟର ଶିକ୍ଷକ ନିଯୁକ୍ତି ପାଇଥିଲେ ମଧ୍ୟ ସେ ଉଚ୍ଚ କର୍ତ୍ତୁପକ୍ଷଙ୍କୁ ପ୍ରଲୋଭିତ କରି ଭୁବନେଶ୍ୱର ହେଡକ୍ୱାଟରକୁ ଡେପୁଟେସନରେ ପଳାଇଛନ୍ତି । ଫଳରେ ଛାତ୍ରଛାତ୍ରୀ ମାନଙ୍କୁ କମ୍ପ୍ୟୁଟର ଶିକ୍ଷା ଦିଆଯାଇ ପାରୁନାହିଁ । ବିଦ୍ୟାଳୟରେ ୧୫ଜଣ ଶିକ୍ଷକଙ୍କ ଆବଶ୍ୟକତା ଥିବାବେଳେ ମାତ୍ର ୫ଜଣ ଶିକ୍ଷକ ନିଯୁକ୍ତି ଥିବାରୁ କିପରି ଶିକ୍ଷାଦାନ ହେଉଥିବା ତାହା ସହଜରେ ଅନୁମେୟ । ପିଅନ, ସୁଇପର କି ୱାଚମ୍ୟାନ ନଥିବାରୁ ବିଦ୍ୟାଳୟକୁ ପରିସ୍କାର ପରିଛନ୍ନତା ରଖିବା ସମ୍ଭବପର ହେଉ ନାହିଁ । ଆଜି ପର୍ୟ୍ୟନ୍ତ ମିୟୁଜିକ ଟିଚର ମଧ୍ୟ ନିଯୁକ୍ତି ଦିଆଯାଇ ନାହିଁ । ବିଦ୍ୟାଳୟରେ ନାନା ସମସ୍ୟା ଥିଲେ ମଧ୍ୟ ଅଭିଭାବକ ମାନେ ଉତ୍ତମ ଶିକ୍ଷାଦାନ ପାଇଁ ସେମାନଙ୍କ ପିଲାମାନଙ୍କୁ ଏହି ବିଦ୍ୟାଳୟରେ ଛାଡିଥିଲେ । ମାତ୍ର ଶିକ୍ଷା ବ୍ୟବସ୍ଥାରେ ନାନା ସମସ୍ୟା ଦେଖା ଦେଉଥିବାରୁ ଅଭିଭାବକ ମାନେ ତୀବ୍ର ଅସନ୍ତୋଷ ପ୍ରକାଶ କରି ସେମାନଙ୍କ ପିଲାମାନଙ୍କୁ ଏଠାରୁ ନେଇଯିବା ପାଇଁ ଚିନ୍ତା କରୁଥିବା ଅଭିଭାବକମାନେ ପ୍ରକାଶ କରିଛନ୍ତି । ପିଲାମାନଙ୍କ ପାଇଁ ହଷ୍ଟେଲର ବ୍ୟବସ୍ଥା ନଥିବାରୁ ଯାତାୟତ ପାଇଁ ଛାତ୍ରଛାତ୍ରୀ ତଥା ଅଭିଭାବକମାନେ ନାନା ଅସୁବିଧା ଭୋଗ କରୁଛନ୍ତି । ଏପରିକି ବିଦ୍ୟାଳୟ ସମ୍ମୁଖରେ ଥିବା ନଳକୂପଟି ଦୀର୍ଘଦିନ ହେବ ଅଚଳ ହୋଇପଡିଥିବାରୁ ଛାତ୍ରଛାତ୍ରୀ ମାନେ ପାଣିପାଇଁ ଅସୁବିଧା ଭୋଗ କରୁଛନ୍ତି । ବିଦ୍ୟାଳୟ ଚାରିପାଖେ ପାଚେରୀ ନିର୍ମାଣ ହୋଇ ନଥିବାରୁ ଅସାମାଜିକ ଯୁବକମାନେ ପସି ନାନା ଅଘଟଣ ଘଟାଉଛନ୍ତି । ଗତ କିଛିଦିନ ତଳେ ଗ୍ରୀଲ ଭାଙ୍ଗି ଚୋରୀ କରିବାକୁ ଉଦ୍ୟମ କରି ବିଫଳ ହୋଇଛନ୍ତି । ସେହିପରି କିଛି ଲୋକ କ୍ୟାମ୍ପସ ଭିତରେ ଜବରଦଖଲ କରି ରହିଥିବା ହେତୁ ବିଦ୍ୟାଳୟର ସୌନ୍ଦର୍ୟ୍ୟ ନଷ୍ଟ ହେଉଛି । ଦେଢ଼ବର୍ଷ ହେଲା ବିଦ୍ୟାଳୟ ଖୋଲାଯାଇଥିଲେ ମଧ୍ୟ ଆଜି ପର୍ୟ୍ୟନ୍ତ ସ୍ଥାୟୀ ଅଧ୍ୟକ୍ଷ ନିୁକ୍ତି ଦିଆଗଲା ନାହିଁ । ଏହାକୁନେଇ ଆଜି ଶତାଧିକ ଅଭିଭାବକଙ୍କ ଏକ ବୈଠକ ବସି ସରକାରଙ୍କ ଦାୟିତ୍ୱ ହୀନତା ବିରୁଦ୍ଧରେ ଅସନ୍ତୋଷ ପ୍ରକାଶ ପାଇବା ସହ ଆନ୍ଦୋଳନ କରିବାକୁ ନିଷ୍ପତି ନେଇଥିବା ଜଣାଯାଇଛି । ଅଭିଭାବକ ମାନେ ସେମାନଙ୍କ ପିଲାମାନଙ୍କ ଶିକ୍ଷାଦାନ ପାଇଁ ବହୁ ସମୟ ନଷ୍ଟ କରୁଥିଲେବି ପ୍ରଶାସନ ଆଜି ପର୍ୟ୍ୟନ୍ତ ସେମାନଙ୍କ ଅଭିଯୋଗକୁ ଶୁଣୁ ନଥିବା ପ୍ରତିବାଦରେ ଅଭିଭାବକମାନେ ସେମାନଙ୍କ ଛାତ୍ରଛାତ୍ରୀଙ୍କୁ ଧରି ରାଜରାସ୍ତାରେ ବସିବେ ବୋଲି ଚେତାବନୀ ଦେଇଛନ୍ତି ।
