ଓଡ଼ିଶା ଟି-୨୦ ଲିଗ୍ର ପ୍ଲେଅଫ୍ କାର୍ଯ୍ୟସୂଚୀରେ ପରିବର୍ତ୍ତନ
କଟକ,(ଓ୍ବାଇଏନଏସ): ପାଣିପାଗ ପରିସ୍ଥିତି ଏବଂ ଗତ କିଛି ଦିନ ଧରି ମ୍ୟାଚ୍ଗୁଡ଼ିକର ଅଗ୍ରଗତିକୁ ଦୃଷ୍ଟିରେ ରଖି ଭାରତ ମସଲା ଓଡ଼ିଶା ଟି-୨୦ ଲିଗ୍–ସିଏମ୍ ଟ୍ରଫିର ପ୍ଲେଅଫ୍ କାର୍ଯ୍ୟସୂଚୀରେ ପରିବର୍ତ୍ତନ କରାଯାଇଛି। ଲିଗ୍ ପରିଚାଳନା ପକ୍ଷରୁ ସଂଶୋଧିତ କାର୍ଯ୍ୟସୂଚୀ ଘୋଷଣା କରାଯାଇଛି। ସଂଶୋଧିତ କାର୍ଯ୍ୟସୂଚୀ ଅନୁଯାୟୀ, ପ୍ଲେଅଫ୍ର କ୍ୱାଲିଫାୟର୍ ମ୍ୟାଚ୍ରେ ପଏଣ୍ଟ ଟେବୁଲ୍ର ଦ୍ୱିତୀୟ ସ୍ଥାନରେ ଥିବା ଦଳ ଓ ତୃତୀୟ ସ୍ଥାନରେ ଥିବା ଦଳ ମଧ୍ୟରେ ମୁକାବିଲା ହେବ। ଏହି ମ୍ୟାଚ୍ ସେପ୍ଟେମ୍ବର ୨୯ ତାରିଖ ରାତି ୭ଟା ୩୦ ମିନିଟ୍ରେ ଖେଳାଯିବ। ଏହାପରେ ଟୁର୍ଣ୍ଣାମେଣ୍ଟର ବହୁ ପ୍ରତୀକ୍ଷିତ ଫାଇନାଲ୍ ମ୍ୟାଚ୍ ସେପ୍ଟେମ୍ବର ୩୦ ତାରିଖ ସନ୍ଧ୍ୟା ୭ଟାରେ ଅନୁଷ୍ଠିତ ହେବ। ଏହି ମ୍ୟାଚ୍ ସହ ଚଳିତ ଓଡ଼ିଶା ଟି-୨୦ ଲିଗ୍–ସିଏମ୍ ଟ୍ରଫିର ଚାମ୍ପିଅନ୍ ନିର୍ଣ୍ଣୟ ହେବ। ସେହିପରି, ସେପ୍ଟେମ୍ବର ୨୯ ତାରିଖ ଦିନ ଅପରାହ୍ନ ୨ଟାରେ ଏକ ପ୍ରଦର୍ଶନୀ ମ୍ୟାଚ୍ ମଧ୍ୟ ଆୟୋଜିତ ହେବ। ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ)ର ସିନିୟର୍ ମହିଳା କ୍ରିକେଟର୍ମାନଙ୍କୁ ନେଇ ଏହି ମ୍ୟାଚ୍ ଖେଳାଯିବ। ଓସିଏ ସିନିୟର୍ ମହିଳା ଦଳର ଖେଳାଳିମାନେ ଏଥିରେ ଅଂଶଗ୍ରହଣ କରିବେ। ଦିନଟିର ନିର୍ଦ୍ଧାରିତ କ୍ରିକେଟ୍ କାର୍ଯ୍ୟକ୍ରମର ଅଂଶ ଭାବେ ଏହି ପ୍ରଦର୍ଶନୀ ମ୍ୟାଚ୍ ଆୟୋଜିତ ହେବ। ପାଣିପାଗ ସ୍ଥିତି ଓ ମ୍ୟାଚ୍ଗୁଡ଼ିକର ଅଗ୍ରଗତିକୁ ନଜରରେ ରଖି ପ୍ଲେଅଫ୍ ତାରିଖରେ ଏହି ପରିବର୍ତ୍ତନ କରାଯାଇଥିବା ଲିଗ୍ ପରିଚାଳନା ପକ୍ଷରୁ ସୂଚନା ଦିଆଯାଇଛି।
