ମହିଳାଙ୍କ ସନ୍ଦେହଜନକ ମୃତ୍ୟୁ ସ୍ୱାମୀ ଅଟକ, ହତ୍ୟା ଅଭିଯୋଗ କଲେ ପରିବାର

ଯୋଡା (ସମୀର କୁମାର ଦାସ) : ସହରର ପଶ୍ଚିମ ଯୋଡା ସ୍ଥିତ ଟିସ୍କୋ କଲୋନୀରେ ଜଣେ ମହିଳାଙ୍କ ସନ୍ଦେହଜନକ ମୃତ୍ୟୁ ଘଟଣାରେ ପୋଲିସ ମୃତ ମହିଳାଙ୍କ ସ୍ୱାମୀଙ୍କୁ ଥାନାରେ ଅଟକ ରଖିଛି । ଶନିବାର ଅପରାହ୍ନରେ ବଡବିଲ୍ ଏସଡିପିଓ ସତ୍ୟ ବିକାଶ ଭୂୟାଁ, ଯୋଡା ଥାନା ଆଇଆଇସି ରାଇସେନ୍ ମୁର୍ମୁ , ଅତିରିକ୍ତ ତହସିଲଦାର ତଥା ସହକାରୀ ମାଜିଷ୍ଟ୍ରେଟ୍ ସଶ୍ମିତା ହୋତାଙ୍କ ଉପସ୍ଥିତିରେ ଘର ଭିତରୁ ମହିଳାଙ୍କ ମୃତ ଦେହ ଉଦ୍ଧାର କରାଯାଇ ବ୍ୟବଛେଦ ପାଇଁ ବଡବିଲ ଡାକ୍ତରଖାନାକୁ ପଠାଯାଇଛି । ମୃତ ମହିଳା ଶିବାନୀ ସାହୁ(୨୩)ଙ୍କ ବାପ ଘର କେନ୍ଦୁଝର ଜିଲା ତେଲକୋଇ ବ୍ଲକରେ ହୋଇଥିବା ବେଳେ ସେ ଦେବଗଡ ଜିଲା ବାରକୋଟ୍ ଅଂଚଳର ମାନସ ରଂଜନ ସାହୁଙ୍କୁ ବିବାହ କରି ଯୋଡାରେ ରହୁଥିଲେ । ସ୍ୱାମୀ ମାନସ ବିଭିନ୍ନ ସମୟରେ ଶିବାନୀଙ୍କୁ ବାପ ଘରୁ ଟଙ୍କା ଆଣିବା ପାଇଁ ଚାପ ପକାଉଥିଲେ ଏବଂ ଜ୍ୱାଇଁ ମାନସ ଯୌତୁକ ପାଇଁ ହିଁ ଶିବାନୀଙ୍କୁ ହତ୍ୟା କରିିଥିବା ଶିବାନୀଙ୍କ ବାପ ଘର ଲୋକେ ଯୋଡା ଥାନାରେ ଲିଖିତ ଅଭିଯୋଗ କରିଛନ୍ତି । ଏନେଇ ପୋଲିସ ଯୋଡା ଥାନାରେ କେଶ୍ ନଂ ୯୧/୨୦୨୦ ହତ୍ୟା ମାମଲା ରୁଜୁ କରି ମୃତ ମହିଳାଙ୍କ ସ୍ୱାମୀଙ୍କୁ ଥାନାରେ ଅଟକ ରଖି ଏହାର ଅଧିକ ତଦନ୍ତ ଜାରି ରଖିଥିବା ଯୋଡା ଥାନା ଆଇଆଇସି ରାଇସେନ୍ ମୁୁର୍ମୁ କହିଛନ୍ତି ।